CTEgarn starta som eit samarbeid mellom Caroline (niese som då var 9 år) og meg, Tante Elin (som er mykje eldre). Begge to er glade i fargar og kreative prosessar og likte å jobba i lag. I dag er det berre eg som fargar. Caroline har vorte så gamal at ho skal bruka tida si på skule og vener. Ho skal sleppa å vera i lag med gamle tanter. Eg ringer framleis til ho og spør om råd til fargekombinasjonar og framleis er fargane ho blanda blant dei mest populære fargane i sortimentet mitt.
Eg held til i Sandnes og fargar garn som du får kjøpt både i nettbutikken og på lageret/butikken i Luragata 34 i Sandnes.
Eg produserer små parti av kvar farge om gongen. Frå 200 gram i kvar gryte til 1000 gram. Ingen av hespa vil verta heilt like sjølv om dei kjem frå same gryte og kvart nøste vil ha ein variasjon i fargen. Det kan lønna seg å strikka med to hespe samstundes og strikka ein omgang med det eine og den neste med det andre slik at overgangane i strikketøyet ikkje vert store.
Caroline har vore hovudfarge- og navneansvarleg heilt sidan me starta, eg har aldri fått til dette med namn på fargane. Det er alltid stor fare for at nye fargar vert liggande i vekevis utan å koma ut i nettbutikken, fordi eg ikkje klarar å finna på kva dei skal heita. Då vert det teke telefonar til Caroline og så er den saken fiksa.
Det er òg ho som har teikna logoen vår. Eg elskar han.
